కేరళలోనే ఉన్న పరశురాముడు

పరశురాముడు

 కేరళలో 'తిరనళ్వేళి' జిల్లాలో మహేంద్రగిరి అనే పర్వతంలో పరశురాముడు ఉన్నట్టు ఆధారాలు ఉన్నాయి. దాదాపు 500 సంవత్సరాల క్రితం రాధాకృష్ణుల గురించి ప్రచారం చేసిన "చైతన్యప్రభువు" తిరుప్పుళ్ళురు లో ఉన్న "ఆది జగన్నాధ పెరుమాళ్" (ఇక్కడ శ్రీరాముడు దర్భాసనం వేసుకుని విశ్రాంతి తీసుకున్నట్టుగా ఒక గుడి కట్టారు.) గుడిని దర్శించుకుని అక్కడ ఉన్న మహేంద్ర పర్వతం పై ఉన్న పరశురామున్ని కలిసి దర్శించుకున్నట్టుగా అక్కడ ఒక శాసనం కూడా ఉంది. క్షత్రియులందరినీ చంపి  వారి రక్తంతో  7 చెరువులను తయారుచేస్తారు. దానినే శమంతపంచకం అంటారు. అదే కురుక్షేత్రం. ఆ చంపిన రాజుల నుంచి తీసుకున్న భూబాగాన్ని అంతటినీ కస్యపునికి ఇచ్చి తను తపస్సు చేసుకోవడానికి సముద్రం దగ్గరకి వెళ్ళి తన గొడ్డలిని విసిరి అది ఎంతవరకూ వెళ్ళి పడుతుందో అంత వరకూ సముద్రం వెనకకు వెళ్ళి ఆ స్థలాన్ని పరశురాముడు తీసుకుంటారు. అదే ఇప్పుడు కేరళ గా వ్యవహరిస్తున్నారు. అక్కడ ఉన్న దేవాలయాలన్ని ఎక్కువ శాతం పరశురాముడే ఏర్పరచినవి.                                             

వాటినే "పరశురామక్షేత్రాలు" అంటారు. పరశురాముడు సమస్త అస్త్రవిద్యలన్నీ సాక్షాత్తూ ఆ పరమశివున్నే మెప్పించి ఆయన దగ్గరే నేర్చుకున్నారు. ఆ తపో శక్తికి పరమశివుడు చిరంజీవిగా ఉండాలని వరం ఇస్తారు.  త్రేతాయుగంలో రాముని వివాహం దగ్గరకు వచ్చి శివధనుస్సును విరిచినందుకు ఆగ్రహించి, తన దగ్గర ఉన్న విష్ణుచాపాన్ని కూడా ఎక్కుపెట్టమని రామున్ని ఆజ్ఞాపిస్తాడు. తరువాత ద్వాపరయుగంలో ఆయన భీష్మునికీ, కురు కుల గురువు అయిన ద్రోణాచార్యునికీ, కర్ణుడికీ కూడా తన దగ్గర ఉన్న అస్త్ర విద్యలన్నీ వారికి చెప్పారు. అంతేకాకుండా కలియుగంలో కల్కకి కూడా ఆయనే గురువుగా విద్యలన్నీ చెప్తారని పురాణంలో ఉంటుంది. ఇప్పటికీ మహేంద్రగిరి దగ్గర ఒక బ్రాహ్మణునిగా జీవితం గడుపుతూ కల్కి భగవానుని కోసం వేచి చూస్తూ ఉంటారు. వైశాఖ మాసం శుక్లపక్షమ తృతీయ నాడు పరశురామ జయంతిగా వ్యవహరిస్తారు. పరశురామున్నే భార్గవరాముడు, జామదగ్ని అని కూడా అంటారు. పరశురాముని తండ్రి జమదగ్ని మహర్షి, తల్లి రేణుకాదేవి. విష్ణుమూర్తి ఆరవ అవతారం పరశురాముడు.